ҚР Ұлттық музейінде ТМД-ға мүше мемлекеттердің «ART EXPO» халықаралық көрмесі ашылды.
Тәуелсіз Мемлекеттер Достастығында 2022 жыл халық шығармашылығы мен мәдени мұра жылы деп жарияланды. Осыған орай биылғы көрме «ART кеңістіктегі халық шығармашылығы» тақырыбында өтуде.
Көрменің ресми ашылу салтанатында «Тұран» этно-фольклорлық ансамблі мен «Гүлдер» би ансамблі өнер көрсетіп, «Қорқыт» этноансамблі "Ортеке" биін паш етті.
Экспозицияға халық шығармашылығы саласындағы 200-ден астам жұмыс қойылып отыр, соның ішінде Ресей, Өзбекстан, Беларусь, Тәжікстан және Қазақстан суретшілері мен шеберлерінің картиналары, зергерлік бұйымдары, сәндік-қолданбалы өнер туындылары бар.
Көрме аясында қазақстандық қолөнершілер қонақтарға тоқыма өнері, қыш құмыра және зергерлік бұйымдар жасау бойынша шеберлік сыныптарын өткізді.
Сонымен қатар, ТМД-ға мүше мемлекеттерге қарасты мүдделі құрылымдар мен мәдени ұйымдар арасында шығармашылық байланыстар орнату мақсатында әр елдің халық шығармашылығы саласындағы жекелеген жетістіктерінің таныстырылымы өтті.
Көрме қатысушысы, Беларусь Суретшілер одағының төрағасы Глеб Отчик қазақстандық павильонның экспонаттарын жоғары бағалап, мұндай іс-шаралар ТМД елдерінің мәдени байланыстарын нығайтатынын атап өтті.
«АRТ EXPO» – бұл Тәуелсіз Мемлекеттер Достастығы шеңберінде ынтымақтастықты дамытуға, ұлтаралық келісімді насихаттау мен басқа халықтардың мәдениетіне, тілі мен дәстүріне құрмет көрсетуге, жастардың бойында патриотизмді қалыптастыруға бағытталған кешенді іс-шара.
Шара барысында ТМД-ға мүше мемлекеттердің мәдени ынтымақтастық жөніндегі кеңесі аясында екіжақты кездесулер, музейлік road-show және Ұлттық музейдің экспозициялық залдарына экскурсиялар ұйымдастырылады.
Көрменің ресми ашылу салтанатына дипломатиялық қоғамдастық және зиялы қауым өкілдері, мемлекет және қоғам қайраткерлері, мәдениеттанушылар қатысты.
«АRТ EXPO» халықаралық көрмесі 10 қыркүйекке дейін жалғасады.
