2026 жылғы 7 сәуірде Қазақстан Республикасының Ұлттық музейінде корейлік жаңа медиа суретшісі Хван Сонджонның «Планетарлық өрім: Теллуриялық ырғақтар мен тоғысқан естеліктер» атты жеке көрмесінің ашылуы өтеді.
Көрме қазіргі заманның жаһандық өзгерістері жағдайында адам, табиғат және технология арасындағы өзара байланыстарды зерттеуге арналған. Суретші өз туындыларында адамның әлемді қабылдау шекараларын қарастырып, тірі мен жансыздың, көрінетін мен көрінбейтіннің арасындағы байланыстарды жаңа қырынан пайымдауға мүмкіндік береді.
Экспозиция бейне, дыбыс, қозғалыс және визуалды образдарды біріктіретін мультисенсорлық кеңістік ретінде ұсынылады. Инсталляциялар мен дыбыстық композициялар арқылы автор табиғаттың ырғақтарын сезінуге мүмкіндік беретін ерекше орта қалыптастырып, көрерменді планеталық экожүйедегі барлық элементтердің өзара байланысы туралы ойлануға шақырады.
Хван Сонджон – жаңа медиа саласындағы суретші әрі композитор. Суретші organic Operators (oOps.50656) медиа-арт дуэтінің мүшесі және Hertz and Dough зерттеу дыбыстық зертханасының негізін қалаушы. Ол SONGEUN Art Award сыйлығының финалисі, сондай-ақ ISEA 2023 (Франция) және Future Tense (Гонконг) халықаралық марапаттарының лауреаты. Оның жұмыстары SeMA, Sonic Acts Biennale, ACC және MUTEK JP+MX сияқты халықаралық көрмелер мен фестивальдерде ұсынылған.
