Қазақстан Республикасының Ұлттық музейінде Ресейдің «Inclusive Dance» халықаралық фестивалінің бас хореографы Наталья Головкина хореографтарға арналған инклюзивті би және би арқылы оңалту бойынша шеберлік сабағын өткізді. Бұл іс-шара жақында музейде ашылған «Мейірім» балалар шығармашылығының VIII инклюзивті музейлік фестивалі аясында ұйымдастырылды.

Музей педагогикасы және балалар шығармашылығы бөлімінің кіші ғылыми қызметкері Бибігүл Арыстанбекованың айтуынша, шеберлік сабағына 30-ға жуық хореограф қатысып, инклюзивті би өнерінің қыр-сырын үйренді.

«Бұл – біліктілікті арттырудың тамаша мүмкіндігі. Бұған қоса, айта кететін бір жайт, біз биыл фестивальді бірінші рет би форматында өткіздік. Осыған дейін бұл шараны 7 рет шеберлік сабағы форматында өткізген едік. Кеше көптеген өнерпаздар өз өнерлерін ортаға салды», – деді Бибігүл Төлегенқызы.