«Бақытты аққала» тақырыбындағы үйірме сабақ

Ұлттық музейде «Бақытты аққала» тақырыбында үйірме сабағы өтті. Оған елордалық Ы. Алтынсарин атындағы № 83 мектеп-гимназияның 12 оқушысы қатысты. Сабақты ҚР Ұлттық музейінің өнертану бөлімінің ғылыми қызметкері Шолпан Теміртасқызы өткізді. Мақсаты – арнайы білім беру қажеттіліктері бар балалардың қол моторикасын, зейінді, жадыны, қабылдауды, ойлауды, тілді қоса бүкіл психикалық процестерді дамытуға көмектесу. Фетрден аққала жасау атауы қиын болып көрінгенімен, Шолпан Теміртасқызының оқушыларға жасалу жолын түсіндіргенде, балалар жұмысты құлшына бастап кетті. «Қолөнер ғаламшары» үйірмесінің ерекшелігі - әр сабақта мұғалімдер бала үшін тәлімгер ғана емес, сонымен бірге өзінің қиындықтары мен жетістіктері жөнінде айта алатын сырласына айналады. Сабақ барысында жайлы араласу ортасында құнды адами қасиеттер ашылады, балалардың дарыны мен шығармашылық қабілеттері айқындалады. Балалардың осы санатымен жұмыс істейтін педагогтың оның даму ерекшеліктері, қызығушылықтары мен мүмкіндіктерін ескеретінін, әртісшілдігін, қиялын, шығармашылық қабілеттерін танытатынын атап өткен маңызды. Сабақ соңында балалар өз жасаған жұмыстарына көңілдері толып, көздеріне мақтаныш сезімі ұялағандай көрінді.