ҚАЗАҚСТАНДЫ ТЕҢГЕ АРҚЫЛЫ ТАНЫ

Ұлттық музейде «Қазақстанды теңге арқылы таны» көрмесі өтті. Экспозиция ұлттық валюта – теңгенің енгізілгеніне 30 жыл толуына орайластырылған. Көрме экспонаттары елдің қалыптасуы мен дамуын суреттейтін ең негізгі мәдени, саяси және тарихи кезеңдерді қамтиды, сондай-ақ халқымыздың әдет-ғұрыптары мен салт-дәстүрін паш етеді. Көрмеге келушілер алтыннан, күмістен, сондай-ақ бағалы емес металдардан жасалған 500-ден астам түрлі монеталармен танысты. Оларды дайындау кезінде жаңа технологиялар қолданылған. Сонымен қатар, экспозицияға халықаралық байқауларда орын алған, сол секілді салмағы 2 кг сирек кездесетін ірі монеталар қойылды. Іс-шараның негізгі мақсаты – «Сақ стилі» банкноталары мен KOKBÓRI инвестициялық монеталарының жаңа сериясын көпшілікке таныстыру, сондай-ақ банкноталар мен монеталар шығару саласындағы Қазақстанның жетістіктерін көрсету. "Теңгеміздің жаңа сериясы Сақ дәуіріндегі аң стилінде жасалуын тарихи заңдылық деп есептейміз. Қалың көпшілік, әсіресе жас ұрпақ ғасырлар қойнауынан бастау алатын ел тарихы мен мәдениетін білуі тиіс. Бұл бағытта Ұлттық музей, Ұлттық банк, жалпы қоғам болып үлес қосу аса маңызды", - деп атап өтті ҚР Ұлттық музейі директорының ғылыми жұмыстар жөніндегі орынбасары Ақмарал Ибраева. Көрме аясында ұлттық валютаның жаңа банкноттық сериясы ұсынылды. Ол «Сақ стилі» элементтеріне негізделген және көшпенділердің бірегей мәдениетінен бастап заманауи Қазақстанға дейінгі ел мұрасын бейнелейді. Сондай-ақ экспозицияда ҚҰБ дизайнерлері «Көшпенділердің ғибадат жануарлары – тотемдері» монеталар сериясының көркемдік тұжырымдамаларын пайдаланған KOKBÓRI инвестициялық монеталарының ребрендингі туралы айтып берді. Ұлттық нақыштағы элементтер қамтылған эксклюзивтілік пен дизайнерлік шешім KOKBÓRI монеталарына инвестициялық құрал ретінде ғана емес, сол секілді коллекциялау мен сыйлық ретінде де қызығушылықты арттыруға көмектеседі.